Садыр Жапаров Тажикстандын президенти Эмомали Рахмон менен сүйлөшүүлөрдү жүргүздү

Бүгүн, 9-октябрда президент Садыр Жапаров Тажикстанга болгон иш сапарынын алкагында Душанбе шаарында президент Эмомали Рахмон менен жолугушту.

Өлкө башчысынын басма сөз кызматы билдиргендей, жолугушуунун алдында Өкмөттүк резиденцияда саламдашуу аземи жана биргеликте сүрөткө түшүү болуп өттү, андан соң мамлекет башчылар сүйлөшүүлөр залына жөнөштү.

Тараптар Кыргызстан менен Тажикстандын ортосундагы эки тараптуу күн тартибин, ошондой эле ар кандай тармактарда мындан аркы өз ара аракеттенүү келечегин талкуулашты.

Эмомали Рахмон өлкөлөр аймактык жана эл аралык уюмдардын алкагында тыгыз кызматташып, эл аралык аренада бири-биринин демилгелерин колдоп жатканын канааттануу менен белгиледи.

Садыр Жапаров КМШ Мамлекет башчыларынын кеңешинин жыйынына жана "Россия + Борбор Азия" экинчи саммитине катышуу үчүн Тажикстанга иш сапар менен келүүгө чакыргандыгы жана тажик жеринде көрсөтүлгөн салттуу жогорку меймандостук үчүн ыраазычылык билдирди.

Ал ошондой эле кыргыз-тажик мамилелери кылымдар бою келе жаткан достук жана коңшулаштык байланыштарга негизделгенин белгиледи.

Жолугушуунун соңунда тараптар эки жактуу жана көп тараптуу форматтарда мындан аркы кызматташтыкты бекемдөө үчүн биргелешкен аракеттерди көрүүгө макулдашышты.