Трамп: "НАТОго сатылган америкалык куралдын басымдуу бөлүгү Украинага жөнөтүлөт"

АКШнын президенти Дональд Трамп Вашингтон НАТО өлкөлөрүнө активдүү түрдө курал сатып жатканын билдирди. Бул тууралуу чет элдик басылмалар жазышты.

Анын айтымында, бул куралдардын басымдуу бөлүгү кийинчерээк Украинага жөнөтүлөт. Бул тууралуу ал бейшемби күнү Ак үйдө Финляндиянын президенти Александер Стубб менен жолугушуу учурунда айты.

"Биз НАТОго көп курал сатабыз, жана менимче, анын чоң бөлүгү Украинага жөнөтүлөт",- деди Трамп.

Буга чейин Орусия бир нече жолу Батыш өлкөлөрүнүн Киевге курал-жарак жеткирүүсү конфликтти тынчтык жолу менен чечүүгө тоскоол болуп жатканын билдирген. Орусиянын тышкы иштер министри Сергей Лавров Украинага багытталган курал-жарак ташылган бардык жүктөрдү мыйзамдуу аскердик бута катары карай турганын эскерткен.