Telegraph: Эгер Трамп Нобель сыйлыгын албай калса, Норвегияга бажы төлөмдөрүн киргизиши мүмкүн

АКШ президенти Дональд Трамп Нобель тынчтык сыйлыгын албай калса, Норвегияга бажы төлөмдөрүн киргизиши мүмкүн. Бул тууралуу The Daily Telegraph гезитинин маалымдады.

Маалыматка ылайык, Трамптын "жооп иретиндеги чараларынын" катарында норвегиялык газ жана мунайдан баш тартууга чакырыктар, ошондой эле Осло менен расмий байланыштарды чектөө сыяктуу кадамдар да болушу ыктымал.

Буга чейин Трамп Нобель тынчтык сыйлыгын алууга кызыктар экенин бир нече жолу кыйыткан. Анын айтымында, ал өзүнүн экинчи президенттик мөөнөтүнүн ичинде жети согушту, тагыраагы Камбоджа менен Таиланд, Косово менен Сербия, Конго менен Руанда, Пакистан менен Индия, Израил менен Иран, Египет менен Эфиопия жана Армения менен Азербайжан ортосундагы жаңжалды жөнгө салган.

Ошондой эле, ал Израил менен ХАМАСтын ортосундагы кагылышууну да жөнгө салууну көздөп жатканын, жана бул сегизинчи согуш экенин айткан.

Нобель тынчтык сыйлыгынын лауреаты бүгүн, 10-октябрда Ослодо жарыяланат.