AP: АКШ ок атышууну көзөмөлдөө үчүн Израилге 200 аскер жөнөтөт

АКШ ок атышууну токтотуу келишимин көзөмөлдөө максатында Израилге 200гө жакын аскер жөнөтөт. Бул тууралуу Associated Press агенттиги жазды.

Маалыматка ылайык, Израилде атайын "аскердик-жарандык координациялык борбор" түзүлөт. Бул борбор гуманитардык жардамдын жеткирилишин координациялайт, логистика жана коопсуздук жагынан колдоо көрсөтөт.

Комиссиянын курамына АКШнын өнөктөш өлкөлөрүнүн аскер кызматкерлери жана жеке уюмдардын өкүлдөрү кирет. Reuters агенттигинин маалыматына ылайык, курамга Египет, Катар, Түркия жана Бириккен Араб Эмираттарынан да аскер кызматкерлери кошулушу мүмкүн.

Эске салсак, кечээ, 9-октябрда АКШ президенти Дональд Трамп Израил менен ХАМАС уюму тынчтык планын ишке ашыруунун биринчи этабы боюнча келишимге жетишкенин жарыялады. Бул этапка барымтадагы адамдарды бошотуу, Израил аскерлерин макулдашылган чекке чейин артка чыгаруу кирет.

Бул кадам Жакынкы Чыгыштагы чыңалууну азайтуу жана гуманитардык кырдаалды жакшыртуу максатын көздөйт.