Милиция Жалал-Абадда кыздын токмоктолушу боюнча маалымат берди

Жалал-Абад облустук милициясы зомбулукка кабылганы айтылып жаткан кыз тууралуу маалымат берди.

Облустук ички иштер башкармалыгы милицияга 5 күн мурун, тагыраагы, 5-октябрда Манас шаарынын 24 жаштагы тургуну арыз менен кайрылганын белгиледи. Арыз ээси ошол эле күнү таңкы саат 07:00 чамасында 24 жаштагы тааныш жигит аны Сузак районундагы Кызыл-Туу айылында эч себепсиз эле уруп, денесине жаракат келтиргендигин билдирген.

Факт каттоого алынып, тергөөгө чейинки териштирүү иштери башталган. Жабырлануучуга атайын соттук-медициналык экспертизалар дайындалган. Текшерүүдө алардын ортосунда кыз-жигит мамилеси болгону, үйлөнүүнү максат кылып жүрүшкөндөрү, пикир келишпестиктен улам урушуп кетишкени маалым болгон.

Облустук милиция учурда тергөө иштери жүрүп жатканын жана кошумча дагы маалымат берилерин белгиледи.

Буга чейин социалдык тармактарда Манас шаарында ур-токмокко кабылганы айтылган кыздын видеосу тарап, талкуу жаратып жаткан.