Украинада ракеталык сокку болуп, курман болгондордун арасында бала да бар

10-октябрга караган түнү Орусия Украина аймагына дрондор жана баллистикалык ракеталар менен массалык сокку урду. Натыйжада Киевде 12 киши жаракат алып, Запорожье шаарында 7 жаштагы бала каза болду. Бул тууралуу Киев шаарынын мэри Виталий Кличко билдирди.

Маалыматка ылайык, сегиз жабырлануучу ооруканада, ал эми төртөө амбулатордук жардам алып жатат. Анын айтымында, бир нече жарылуудан кийин шаарда жарык өчүп, метронун айрым бөлүктөрүндө кыймыл токтоп, мектептер онлайн окутууга өткөн. Шаардын сол жээгинде электр жана суу берүү үзгүлтүккө учураган.

Украинанын энергетика министри Светлана Гринчук Орусия атайылап энергетикалык инфраструктурага сокку урганын белгиледи. Днепропетровск облусунда өрт чыгып, электр камсыздоодо үзгүлтүктөр катталган. Ал эми Киевдин Печерск районунда дрондун калдыктары турак үйгө түшүп, 17 кабаттуу үйдүн бир нече батири күйүп кеткен. Запорожьеде болсо оор жаракат алган 7 жаштагы бала ооруканада көз жумган.