Сокулукта башка бирөөнүн жерлерин сатып жиберген аял кармалды

Чүй облусунун Сокулук районунда жер тилкелерин мыйзамсыз саткандар аныкталды. Бул тууралуу облустук милиция билдирди.

Милицияга жер сатып алып, алданып калган жарандар кайрылышты. Анда Ж.А. аттуу аял 2022-жылы Военно-Антоновка айылындагы (жаңы аты Кожомкул) 295-контурунан 4 сотыхтан 4 бөлүктү 10 миң доллардан баалап, 40 миң долларга саткандыгы айтылган. Мындан тышкары, коммуналык кызматтарга, кызыл китепке деп кошумча 440 миң сом акчасын алгандыгын билдиришти. Бирок учурда ал участоктордун ээси башка экени аныкталып, арыз ээлери акчасын же жер аянтын ала албай жатышканы кошумчаланды.

Бул факт боюнча Кылмыш-жаза кодексинин 209-беренеси (Алдамчылык) менен кылмыш иши козголду. Натыйжада 1977-жылы туулган Ж.А. кармалып, убактылуу кармоочу жайга киргизилди.

Тергөө иштери жүрүп, кошумча арыздар да келип жаткандыгын милициядан билдиришти.