Ташиевдин катышуусунда "Манас" стелласы ачылды

Кечээ, 11-октябрда Манас шаарындагы Аюб-Тоодо "Манас" стелласынын ачылышы болду. Иш-чарага УКМКнын төрагасы Камчыбек Ташиев, Президенттин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматов, шаар мэри Эрнисбек Ормоков, шаардык кеңештин төрагасы Нуртилек Болотов, шаардык кеңештин депутаттары, мекеме-ишканалардын жетекчилери жана шаар тургундары катышты.

Мэриянын маалымат кызматы билдиргендей, жаңы стелланын бийиктиги 8 метрди түзүп, демөөрчүлөр тарабынан каржыланды.

Атайын кызматтын башчысы ошол эле күнү мектепте болгон жолугушууда шаардын атын өзгөртүү стратегиялык багыт экенин билдирип, Манас шаары 2026-жылы республикалык деңгээлдеги статус ала тургандыгын да кошумчалады.

Айта кетсек, Жалал-Абад шаарынын аталышын Манас деп өзгөртүү демилгесин Жогорку Кеңеш 10-сентябрда жактырып, өлкө башчы 17-сентябрда кол койгон жана мыйзам 27-сентябрда күчүнө кирген. Буга байланыштуу калаадагы “Жалал-Абад” деген стелла "Манас" болуп өзгөртүлдү.