Google АКШдан тышкаркы эң ири жасалма интеллект борборун Индияда курат

Google компаниясы алдыдагы беш жылда Индияга 15 миллиард доллар инвестиция салып, өлкөнүн түштүгүндөгү Висакхапатнам шаарында АКШдан тышкаркы эң ири жасалма интеллект борборун курат. Бул тууралуу чет элдик басылмалар жазышты.

Маалым болгондой, жаңы борбор 1 гигаватттык энергия мүмкүнчүлүгүнө ээ болуп, жогорку иштетүү кубаттуулугуна жана кеңейтилген була-оптикалык тармакка ээ болот.

Google Cloud башкы директору Томас Курян бул долбоор компаниянын Индиядагы эң ири инвестициясы болорун белгилеп, борбор жасалма интеллект системаларынын үзгүлтүксүз ишин камсыз кыларын айтты.

Microsoft, Amazon жана OpenAI сыяктуу компаниялар да Индияда маалымат борборлоруна ири суммадагы каражат салып жатышат. Адистердин баамында, Индия жасалма интеллект жаатындагы дүйнөлүк атаандаштыктын жаңы борборуна айланып барат.