Ысык-Көлдө киши колдуу болгон кыз: Орунбеков шектүү тууралуу кошумча маалымат таратты

Президенттик администрациянын маалыматтык саясат бөлүмүнүн башчысы Дайырбек Орунбеков 17 жаштагы Айсулуунун өлүмүнө шектелген жаран тууралуу кошумча маалымат таратты. Бул тууралуу ал социалдык тармактагы баракчасында бөлүштү.

Анын айтымында, шектүү К. Айсулуудан мурда дагы кыздарды зордуктоого аракет кылып, жыйынтыгында муунтуп өлтүргөн фактылар ачылып жатат.

"Анын курмандыктары 17 жаштан 25 жашка чейинки кыздар болгон. Такси айдоочусу катары келип, унаага салып, андан соң ээн жерге айдап барган. Коркутуп, колун байлап зомбулук жасаган. Тумчуктуруп, муунтуп өлтүргөн. Анын өлтүрүү аракетинин арасында эки кыз тирүү калган.

Бул эки кылмыш боюнча биринде айып пул салынып, ал эми экинчи кыздын ишинде Бишкек шаардык сотунун 3 судьясы адам өлтүрүү аракети боюнча 12 жыл эркинен ажыратуу чечимин өзгөртүп, "Тоноо" беренесине алмаштырган. Мыкаачынын жазасын жеңилдетип салып, натыйжада К. көп өтпөй эркиндикке чыгып кеткен", - деди Орунбеков.

Орунбеков ИИМдин тергөөсүнүн негизинде жергиликтүү телеканалдардын бири иликтөө жасаганын да кошумчалады.