Кыргызстанда дагы бир шаар пайда болду

Президент Садыр Жапаров «Ош облусунун Алай районунун Гүлчө айыл аймагын райондук маанидеги шаар категориясына киргизүү жөнүндө» мыйзамга кол койду. Бул тууралуу өлкө башчынын администрациясынан бүгүн, 15-октябрда билдиришти.

Мыйзам ушул жылдын 25-сентябрында Жогорку Кеңеш тарабынан кабыл алынган.

Ага ылайык, Гүлчө айыл аймагы райондук маанидеги шаар категориясына киргизилип, Ош облусунун Алай районунун Гүлчө шаары деп аталды жана анын чек арасынын баяндалышы бекитилди.

Белгилей кетсек, 12-сентябрда президент Садыр Жапаров Алымбек датканын урматына арналган майрамдык иш-чарада Гүлчө айылына шаар статусун берүү маселесин кароону тиешелүү мамлекеттик мекемелерге тапшырганын айткан.