Өлкөдө айыл өкмөт башчыларын тандоо тартибине өзгөртүү киргизилди

Президент Садыр Жапаров айыл өкмөт башчыларын тандоо тартибине өзгөртүү киргизүү тууралуу мыйзамга кол койду. Бул тууралуу мамлекет башчынын маалымат кызматынан кабарлашты.

Маалым болгондой, мыйзам ушул жылдын 25-сентябрында Жогорку Кеңеш тарабынан кабыл алынган.

Аталган мыйзам жергиликтүү өз алдынча башкаруу жөнүндө мыйзамдарды өркүндөтүү жана айыл өкмөттөрүнүн ишинин натыйжалуулугун жогорулатуу максатында кабыл алынган.

Документке ылайык, эми тиешелүү айыл аймагында туулган адам айыл өкмөтүнүн башчысы болуп дайындала алат.

Белгилей кетсек, буга чейин “Жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамдын 52-беренесинин 3-бөлүгүнүн 3-пунктуна ылайык, тиешелүү айыл аймагында туулган адам айыл өкмөтүнүн башчысы болуп дайындала албайт болчу.