Талас облусу Жапония менен кызматташтыкты бекемдейт

Талас шаарында облус башчысы Эрмат Жумаев жана Кыргыз-Жапон адамды өнүктүрүү борборунун тең төрагасы Шинья Танака эки тараптуу кызматташуу боюнча меморандумга кол коюшту. Бул тууралуу өкүлчүлүктөн билдиришти.

Иш-чаранын жүрүшүндө тараптар Кыргызстан менен Жапониянын ортосундагы кызматташтык соңку жылдары жогорку деңгээлде өнүгүп жатканын белгилешти. Ошондой эле мындан ары бул өнөктөштүк мамиле айыл чарба, жаңы технологиялар, маалыматтык технологиялар (IT), спорт жана маданият тармактарында тереңдетилип, Талас облусунда биргелешкен долбоорлор ишке ашырылары айтылды.

Эрмат Жумаев өз сөзүндө, мындай кызматташуу Талас облусунун социалдык-экономикалык өнүгүүсүнө жаңы мүмкүнчүлүктөрдү ачарын баса белгиледи. Ал эми Шинья Танака мырза Япония тараптан да аймактык долбоорлорду колдоого даяр экенин билдирип, эки элдин достук мамилеси мындан ары да бекемделе берерине ишенимин билдирди.