Польша тышкы иштер министри: "Украина дагы үч жылга чейин согушууга даярданып жатат"

Польша тышкы иштер министри Радослав Сикорский Европа өлкөлөрүн Украинаны дагы үч жыл колдоого даяр болууга чакырды. Бул тууралуу Reuters агенттиги билдирди.

Анын айтымында, украин бийлигинин эсептөөсү боюнча, согуш дагы үч жылга созулушу мүмкүн.

"Украиналыктар бул согушту үч жылга пландап жатышат. Биз Путинге бул жолдон кеминде ушул үч жыл бою кайтпай турганыбызды далилдешибиз керек", — деп айтты Сикорский.

Анын айтымында, "Европаны коргоо үчүн" Украинага көбүрөөк ок-дарылар, абадан коргонуу системалары жана кыска, орто аралыкка атылуучу куралдар керек.

Ошондой эле бүгүн АКШнын коргоо министри Пит Хегсетт билдиргендей, Вашингтон НАТО өлкөлөрүн Украина үчүн көбүрөөк аскердик жардам көрсөтүүгө үндөп жатат.

Украина президенти Владимир Зеленскийдин айтымында, союздаштар өлкөгө азыркыга чейин 2 миллиард доллардан ашуун жардам көрсөтүшкөн. Мындан тышкары АКШ Киевге Tomahawk үлгүсүндөгү канаттуу ракеталарды берүү мүмкүнчүлүгүн да караштырууда.