Ооганстан менен Пакистан эки күнгө согуштук аракеттерин токтотушат

Пакистан өкмөтү менен Ооганстандагы "Талибан" кыймылы ортосундагы согуш аракеттерин 48 саатка токтотуу боюнча келишим түзүштү. Бул тууралуу Reuters агенттиги Пакистандын Тышкы иштер министрлигине таянып кабарлады.

Ок атышууну токтотуу режими бүгүн саат 18:00дөн тартып күчүнө кирип, 48 саатка созулат.

Пакистан ТИМи билдиргендей, эки тарап тең кагылышууну диалог аркылуу тынч жол менен чечүүгө умтулуп жатышат.

Макулдашууга чейин Amaj News басылмасы өз булактарына таянып, Исламабад тараптан Кабулга карай дрон менен төрт сокку жасалганын, дагы бир авиациялык сокку Кандагар провинциясына тийгенин билдирген.

Ал эми өткөн дем алыш күндөрү Кабул Пакистандын бир нече аскердик постторуна сокку урулганын жана 58 пакистандык жоокер өлтүрүлгөнүн билдирген. Бул чабуулдар Ооганстандын аба мейкиндигин кайра-кайра бузууга жооп катары жасалганы айтылган.

Пакистандын армиясы өз тарабынан 23 жоокерин жоготконун, ошол эле учурда 200дөн ашык талиб жана алар менен байланышкан террорчулар жок кылынганын жарыялаган.

15-октябрга караган түнү чек арада кайрадан кагылышуулар башталып, AFP агенттигинин маалыматы боюнча, 15тен кем эмес адам каза болгон.