Орбан Евробиримдиктин Украинага карата чыгымдарын сынга алды

Венгриянын премьер-министри Виктор Орбан Евробиримдик азыркыга чейин Украинага 180 миллиард евро жумшаганын жана кошумча 40 миллиард евролук жаңы жардам пакети пландалып жатканын билдирди. Бул тууралуу ал Будапештте чет өлкөдөгү венгерлерге арналган форумда айткандыгын чет элдик басылмалар билдирди.

Орбан Европа бюджетинин 25 пайыз бөлүгү алдыдагы жети жыл ичинде Украинаны колдоого жумшалат деп белгилеп, бул өлкө ЕБдин мүчөсү болбосо да артыкчылыкка ээ болуп жатканын сынга алды.

Ал ошондой эле Европа Украинадагы согушту улантуу эмес, АКШнын мисалында Орусия менен сүйлөшүү жүргүзүү жолун тандашы керектигин айтып чыкты. Анын пикиринде, согуш токтоп, тынчтык орносо, Европанын экономикасы үч эсе өсмөк.

Мындан мурда венгер басылмасы Magyar Nemzet жазгандай, Украина акыркы үч жылда ЕБден Венгрия 20 жылда алгандан дээрлик эки эсе көп жардам алган.