Зеленский Трамп менен жолугушуу үчүн АКШга барды 

Украинанын президенти Владимир Зеленский 16-октябрь күнү кечинде АКШга учуп барган. Бул тууралуу Зеленский өзүнүн Telegram каналына жазды.

Чет элдик басылмалардын маалыматына ылайык, Украина лидеринин учагы Вашингтондун четиндеги Эндрюс аба күчтөрүнүн базасына конгон.

Зеленский Telegram каналында жакынкы сааттарда америкалык коргонуу компанияларынын өкүлдөрү менен жолуга турганын жана америкалык энергетикалык компаниялардын өкүлдөрү менен да жолугушуусу пландалып жатканын жазган.

"Террорду жана согушту бөгөттөө аракети Жакынкы Чыгышта жакшы натыйжа бере алгандыктан биз Орусиянын Украинага каршы согушун токтотууга да жардам берет деп ишенебиз", - деп билдирген Зеленский.

Буга чейин белгилүү болгондой, 17-октябрда АКШнын президенти Дональд Трамп менен Украинанын президенти Ак үйдө жолугушуу өткөрмөк.

Белгилей кетсек, Трамп 16-октябрда Орусиянын президенти Владимир Путин менен телефон аркылуу сүйлөшкөн.