Бишкекте балкондон чет элдик жаран кулап кетти

Бишкектин Фрунзе көчөсүндө жайгашкан көп кабаттуу үйлөрдүн биринин балконунан 37 жаштагы аял кулап кетти. Бул тууралуу Свердлов райондук милициясынан билдиришти.

Маалыматка ылайык, окуя бүгүн, 24-октябрда болгон.

Жерине барган милиция кызматкерлери батирде чет элдик жарандар — В.Ю. (37 жашта), В.Т. (38 жашта) жана Т.А. (37 жашта) болгону аныкталган. Үч жарандын ортосунда пикир келишпестик чыгып, анын жүрүшүндө акыркысы балкондон кулап кеткен.

Бул факты боюнча Бишкек шаарынын Свердлов РИИБинин Тергөө кызматы тарабынан кылмыш иши козголгон.

Учурда шектүү катары 38 жана 37 жаштагы эки чет элдик жаран кармалып, убактылуу кармоочу жайга киргизилди.

Тергөө амалдары жүрүп жатат.