Жардам берүүнү убада кылган. Бишкекте алдамчылыкка шектүү жаран кармалды

Бишкек шаардык ички иштер башкы башкармалыгы калаада алдамчылыкка шектүү 50 жаштагы жаран кармалганын билдирди.

Ага ылайык, милицияга К.А. аттуу жаран арыз менен кайрылган. Ал ушул жылдын октябрь айында белгисиз адам ага Теңдик конушундагы жер тилкесин алуу үчүн жардам көрсөтүүнү убада кылып, алдамчылык жолу менен 500 миң сом акчасын алганын билдирген. Шектүү акчаны алгандан кийин убадасын аткарбай, белгисиз тарапка качып кеткен.

Аталган факт боюнча Кылмыш-жаза кодексинин 209-беренеси (Алдамчылык) менен кылмыш иши козголгон. Шектүү 50 жаштагы А.А. аттуу жаран кармалып, убактылуу кармоочу жайга киргизилген.

Азыркы учурда анын ушул сыяктуу кылмыштарды жасоого катыштыгы бар экендиги аныкталды.

Шектүүнүн аракеттеринен жапа чеккен же ал тууралуу кандайдыр бир маалыматка ээ жарандар болсо төмөнкү номерлерге кабарласа болот: 0 (702) 07-12-63,0 (700) 95-80-65 же 102.