Бишкектеги мектепте окуучулар массалык түрдө шаурмага ууланышты

Бишкек шаарындагы мектептердин биринде шаурмага 58 адам ууланды. Бул тууралуу Саламаттык сактоо министрлигинен билдиришти.

Маалым болгондой, кечээ, 31-октябрда саат 22:30да Республикалык клиникалык жугуштуу оорулар ооруканасына көп жолу кусуу, ичи өткөн жана катуу ооруксунуунун белгилери менен бейтаптар кайрылышкан.

Анамнездин негизинде белгилүү болгондой, жабыркагандардын бардыгы ошол эле күнү саат 12:00дөн 13:00гө чейин мектептеги ашканада даярдалган шаурманы жешкен.

Жалпы 58 адам медициналык жардамга кайрылган, алардын ичинен 54ү — бала, 4өө — чоң киши. Алардын ичинен 9 бейтап (7 бала жана 2 чоң киши) ооруканага жаткырылган, абалдары туруктуу. Ал эми 49 бейтап кароодон өткөрүлүп, зарыл медициналык жардам көрсөтүлгөндөн кийин тиешелүү консультация берилип, амбулатордук дарылоого жиберилген.

Мекемеден кошумчалангандай, бардык бейтаптарга ашказанды жууп тазалоо жүргүзүлүп, заңдын анализи алынган. Ооруканада дарыланып жаткан бейтаптар бардык керектүү дары-дармектер менен толук камсыздалган.

Санитардык-эпидемиологиялык кызматтын адистери бул окуя боюнча эпидемиологиялык иликтөөнү улантууда.