Бахрейнде III Өспүрүмдөр Азия оюндарынын жабылуу аземи өттү (видео)

Кечээ, 31-октябрда Бахрейн Падышалыгынын Манама шаарындагы Exhibition World Bahrain конгресс-көргөзмө борборунда III Өспүрүмдөр Азия оюндарынын жабылуу аземи болуп өттү. Бул тууралуу Дене тарбия жана спорт мамлекеттик агенттигинен билдиришти.

Иш-чаранын жабылуу аземине Бахрейн Падышалыгынын Жаштар жана спорт боюнча жогорку кеңешинин биринчи төрага орун басары, Башкы спорт башкармалыгынын жана Бахрейн Олимпиадалык комитетинин президенти шейх Халид бин Хамад Аль Халифа, олимпиадалык комитеттердин өкүлдөрү, спортчулар, машыктыруучулар жана делегация мүчөлөрү катышты.

Эл аралык спорттук иш-чаранын расмий бөлүгүндө Азия Олимпиадалык кеңешинин туусу кийинки Өспүрүмдөр Азия оюндарын өткөрө турган Өзбекстанга тапшырылды. IV Өспүрүмдөр Азия оюндары 2029-жылы Өзбекстандын борбору Ташкент шаарында өтөт.

Белгилей кетсек, III Өспүрүмдөр Азия оюндарынын расмий ачылышы 22-октябрда өткөн. Аталган оюндарга дүйнөнүн 45 өлкөсүнөн 6000ге жакын спортчу катышып, спорттун 26 түрү боюнча күч сынашты. Кыргызстандын атынан 18 спорт түрү боюнча 145 спортчу катышты.

Жыйынтыгында Кыргызстандын курама командасы жалпы 21 медаль, анын ичинен 1 алтын, 9 күмүш жана 11 коло медаль утту.