Америкалык аял качып кеткен лабораториялык маймылды атып өлтүрдү

АКШнын Миссисипи штатында лабороториялык жаныбарларды ташып бара жатка унаа кырсыкка кабылган соң качып кеткен маймылдардын бири жергиликтүү тургун тарабынан атып өлтүрүлдү. Бул тууралуу чет элдик басылмалар жазышты.

Маалым болгондой, кечээ, 2-ноябрда маймылды Миссисипи тургуну Жессика Бонд Фергюсон өз короосунан көрүп, ок менен өлтүргөн. Анын айтымында, буга чейин тургундарга маймылдар кооптуу вирус алып жүрүшү мүмкүн деп кабарланган. Жаныбардын сөөгү жапайы жаратылыш департаментине өткөрүлгөн.

Эске салсак, 28-октябрда изилдөөлөрдө колдонулган жана С гепатити, герпес жана COVID-19 вирусун жугузган жаныбарларды ташыган унаа жол кырсыгына кабылып, маймылдар качып кеткен. Ошол эле күнү полиция маймылдарды атып жок кылганын, бирок бирөө эркиндикте калганын кабарлаган.

Башында бир гана маймыл изделип жатат деп айтылганы менен, кийин бийлик дагы үч маймылдын дайынсыз экенин тактады. Бул окуя коомчулукта кооптонууну жаратты.