Мексикада Каза болгондор күнүн белгилөө учурунда мэр атып өлтүрүлдү

Мексиканын Уруапан шаарынын мэри Карлос Мансо шаардын аянтында Каза болгондор күнүн майрамдоо учурунда куралдуу кол салуунун натыйжасында өлтүрүлдү. Бул тууралуу Milenio гезити жазды.

Маалыматка ылайык, 40 жаштагы шаар башчысы Уруапандын эң маанилүү майрамдарынын бири деп эсептелген шамдар фестивалына карата салтанаттуу сөз сүйлөп жаткан. Көп өтпөй эле кеминде беш жолу ок атылган. Алган жаракаттарынан улам мэр ооруканада каза болгон.

Укук коргоо органдары эки кишини кармады, дагы бир кол салган адам каза болду.

Белгилей кетсек, Карлос Мансо Халисконун Жаңы муун картелине – Мексиканын эң жаш жана тез өнүгүп жаткан кылмыштуу уюмдарынын бирине активдүү каршы турган. Август айында укук коргоо органдары топтун жергиликтүү бөлүмүнүн болжолдуу лидерин кармашкан. Андан кийин шаар мэри штатка жана федералдык бийликтерге кошумча колдоо көрсөтүү өтүнүчү менен кайрылган.