Эмгек министрлиги жарандардын 10 миллион сомдой айлык акысын өндүрүп берди 

Жарандардын төлөнбөй келген 63,1 миллион сом компенсациясы жана 9,6 миллион сом эмгек акысы өндүрүлдү. Бул тууралуу Эмгек, социалдык камсыздоо жана миграция министрлигинин басма сөз кызматы билдирди.

Маалыматка ылайык, ушул жылдын сентябрь айынан тарта инспекторлор тарабынан 935 текшерүү жүргүзүлүп, 1009 мыйзам бузуу аныкталган. Үчүнчү чейректе алардын саны жыл башындагыга салыштырмалуу дээрлик төрт эсеге өскөн.

"Жумуш берүүчүлөргө 1320 көрсөтмө берилип, 6,37 миллион сом айып пул салынган, анын ичинен 4,67 миллион сому төлөнгөн. Эмгек коопсуздугу тармагында 123 кырсык катталып, 135 адам жабыркаган, алардын 51и каза болгон. Оор жаракаттардын саны 32ден 21ге чейин кыскарды",- деп жазылган маалыматта.

Көзөмөлдүк иш-чараларынын жүрүшүндө кызматкерлерге 63,1 миллион сом компенсация жана 9,6 миллион сом төлөнбөгөн эмгек акы төлөнүп берилген.