Жапонияда аюулар бир күндө төрт адамды жарадар кылышты

Кечээ, 3-ноябрда Жапониянын Акита префектурасында аюулар төрт адамга кол салышты. The Japan News басылмасынын aif.ru котормосунда жарыяланган маалыматка ылайык, окуялар ар кайсы аймактарда болгон.

"Дүйшөмбү күнү префектурада аюулардын адамдарга кол салуулары биринин артынан бири болгон. Акита шаарында саат 5:30 чамасында жумушка үйдөн чыгып бара жаткан 65 жаштагы кеңсе кызматкерине 1,2 метрлик аюу кол салып, анын натыйжасында бети жаракат алган. Дайсенде саат 7:00 чамасында итин сейилдетип жүргөн 83 жаштагы кишиге аюу кол салган",- деп айтылат маалыматта.

Андан кийин жаныбарлар Товададагы 70 жаштагы кишиге жана Юдзавадагы токойго козу карын терүү үчүн барган 79 жаштагы аялга кол салышкан. Жабырлануучулар башынан оор жаракат алышкан.

Полиция бардык окуялар боюнча иликтөө баштады.