Жогорку окуу жайда окуган индиялык студенттер баңгизат сатууга шектелип кармалышты

Индиядан баңгизаттарын ташып келип, өлкө ичине сатышкан деген шек менен 19 жана 22 жаштагы индиялыктар кармалышты. Бул тууралуу Улуттук коопсуздук мамлекеттик комитети билдирди.

Атайын кызмат алар өлкөдөгү жогорку окуу жайлардын биринде окушарын белгиледи. Индиялыктар баңгизаттарды Instagram'да Indianproduct аталышындагы онлайн дүкөн аркылуу сатып келишкен. Алардын жашаган жеринен болжол менен 1 килограмм баңгизат каражаттары, ошондой эле психотроптук баңгизаттар табылган.

Факт боюнча Кылмыш-жаза кодексинин 282-беренесинин 3-бөлүгүнүн 3-пункту (Баңгизат каражаттарын, психотроптук заттарды жана алардын аналогдорун ири өлчөмдө сатуу максатында мыйзамсыз даярдоо, сактоо, ташуу жана жөнөтүү) боюнча кылмыш иши козголгон.

УКМК учурда баңгизаттарды ташып келүүнүн жолдору, ошондой эле ташууга жана таратууга тиешеси бар адамдарды аныктоо иштери жүрүп жатканын кошумчалады.