Баткенде мурда мыйзамсыз менчиктештирилген жер тилкелери мамлекетке алынды

Баткенде мурда мыйзамсыз менчиктештирилип кеткен жалпы аянты 8,5 гектар жер тилкелери мамлекеттин балансына кайтарылды. Бул тууралуу Улуттук коопсуздук мамлекеттик комитети билдирди.

Маалыматка ылайык, "Болот" дыйкан чарбасынын башчысы тарабынан мыйзамсыз менчиктештирилген Баткен шаарындагы 1,5 гектар, Баткен районундагы Кыштут айылындагы 5 гектар жер тилкелери, ошондой эле "Кызыл-Бел-Автожол" көзөмөл-өткөрүү пунктунун жанында жайгашкан 2 гектар жер тилкеси мамлекетке алынды.

"1994-1995-жылдары жаңы түзүлгөн "Болот" дыйкан чарбасына Баткен районунун жана Баткен шаарынын аймагынан айыл чарба багытындагы жер тилкелери бөлүнүп берилген. Кийинчерээк жер тилкелери чарбанын жетекчиси тарабынан мыйзамсыз менчиктештирилип, жарым-жартылай сатылып кеткен.

1988-жылы "Агропромэнерго" ишканасына мамлекет тарабынан айыл чарба муктаждыктары үчүн жер тилкелери бөлүнүп берилген. 1996-жылы аталган ишкана "Баткенайылэнерго" ЖЧКсы болуп кайрадан түзүлгөн. 2009-2022-жылдары карамагында турган мамлекеттин жерлери ишкананын директору тарабынан мыйзамсыз менчиктештирилип, андан ары коммерциялык багытка трансформацияланган", - деп жазылат маалыматта.

УКМК менчик ээлери ыктыярдуу негизде кайтарышканын кошумчалады.