Жакында эле өрт жалмаган Бишкектеги кинотеатрды маданий борборго айландыруу сунушталды

Бишкек шаарынын мэриясы "Чатыр-Көл" кинотеатрынын имаратын маданий борборго айлантуу демилгесин көтөргөнүн билдирди.

Мындан улам шаар башкармалыгы кинотеатр боюнча токтом долбоорун Министрлер кабинетине макулдашууга жөнөткөн. Токтомдо Маданият, маалымат, спорт жана жаштар саясаты министрлигине караштуу болгон кинотеатрды Бишкек шаарынын мэриясынын карамагына өткөрүү сунушталганы белгиленди.

Мэрия жергиликтүү бюджеттин эсебинен аталган имаратты жаңылап кайра куруу боюнча милдеттенме алат. Бишкек шаардык архитектура башкармалыгы тарабынан объекттин эскиздик планы даярдалган. Токтом долбооруна кол коюлгандан кийин, имаратта демонтаждоо иштери жүргүзүлүп, анын ордуна заманбап маданий борбор курулмакчы.

"Бул маданий борбордо шаар тургундары жана коноктору үчүн бардык шарттар түзүлүп, унаа токтотуучу жай жана керектүү инфраструктура каралат", - деп айтылам маалыматта.

Эске салсак, 2 күн мурун, тагыраагы, 6-ноябрда Токтоналиев көчөсүндө жайгашкан "Чатыр-Көл" кинотеатрынын имаратынан өрт чыккан.