Эдуард Кубатов Камчы Көлбаев менен түшкөн сүрөтү боюнча түшүндүрмө берди

Кыргызстандын Альпинизм федерациясынын президенти Эдуард Кубатов интернет желесинде маркум Камчы Көлбаев менен түшкөн эски сүрөттөрдүн таралышына байланыштуу билдирүү жасады.

Анын айтымында, таанышуу төрт жылдан ашык убакыт мурда Эверест чокусуна чыккан соң болгон.

"Ал мага чалып куттуктап, андан кийин “Барс” спорттук комплексин көрсөткөн. Биз спорттук жана коомдук иш-чараларда гана жолукканбыз. Жалпы иштер же бизнес болгон эмес", - деди Кубатов.

Ошондой эле ал бул сүрөттөр боюнча укук коргоо органдарына түшүндүрмө бергенин жана жашыра турган эч нерсеси жоктугун билдирди.

Акыркы жумаларда социалдык тармактарда саясатчылар менен коомдук ишмерлердин Камчы Көлбаев менен түшкөн эски сүрөттөрү кеңири тарады. Бул көрүнүш парламенттик шайлоо алдындагы үгүт мезгилине туш келип, айрым талапкерлерди каттоодон баш тартууга да себеп болгон. Айта кетсек, федерациянын башчысы Эдуард Кубатов шайлоого катышпайт.