Бишкектин Көк-Жар конушунда чуу жараткан жер тилкелери мамлекетке алынды

Бишкектеги Көк-Жар конушунда жайгашкан 6 гектар жер тилкеси мамлекетке кайтарылды. Бул тууралуу борбор калаанын ички иштер башкы башкармалыгы билдирди.

Маалыматка ылайык, айыл чарба багытында болгон жер тилкелери Кылмыш-жаза кодексинин 336-беренеси (Коррупция) менен козголгон кылмыш ишинин алкагында мамлекетке алынган. Аталган жер тилкелеринин базар баасы 150 миллион сом деп бааланган.

Тергөөдө айрым жарандар менен мамлекеттик кызматкерлердин катышуусунда туруктуу коррупциялык схема түзүлүп, Көк-Жар конушунун 172-контурундагы жерлер мыйзамсыз түрдө бөлүштүрүлгөнү аныкталган.

Натыйжада 14 жаранга айып пул салынган. Ал эми жогоруда айтылган 6 гектар жер тилкелерин тергөөдө 6 жаран ыктыярдуу түрдө Мамлекеттик мүлктү башкаруу фондуна өткөрүп беришкен. Учурда тергөө иштери уланууда.

Айта кетсек, мэрия Бишкек шаарынын Көк-Жар жаңы коңушунун 172-контурунда өзүм билемдик менен айдоо жерлерге үйлөр курулуп жатканын билдирип, түртүрүү иштери жүргөн. Ошол учурда жолду тосуп, башаламандык уюштурду деп 5 кишини милиция кармап кеткен. Бирок алар кайра үй камагына чыгарылган.

Кийинчерээк "жер мафиясынын" өкүлдөрү кармала баштаган.