Алдамчылыкка шектелип "Brand house" курулуш компаниясынын башкы директору кармалды 

Бишкек шаарында алдамчылыкка шектелип "Brand house" курулуш компаниясынын башкы директору кармалды. Бул тууралуу Октябрь РИИБинин басма сөз кызматы кабарлады.

Маалыматка ылайык, ушул жылдын 25-июнунда "И." турак жай комплексинин үлүшчүлөрү тарабынан башкы прокурорго жамааттык кайрылуу келип түшкөн. Алар өз арыздарында Бишкек шаарынын Куйручук көчөсүндө жайгашкан курулуш объектинин жетекчилерине, тактап айтканда "Хан-Строй" ЖЧКсынын башкы директору Э.Н. жана башка адамдарга карата мыйзам чегинде чара көрүүнү суранышкан.

" 2021-2024-жылдардын аралыгында Бишкек шаарынын мамлекеттик архитектурасынан уруксат берүүчү документтери болбосо да, үлүшчүлөрдөн ири өлчөмдөгү акча каражаттарын чогултуп, бирок үйдү бүтүрүп беришкен эмес. Чогултулган акча каражаттарын максатсыз пайдаланган",- деп жазылган маалыматта.

Аталган факт боюнча Кылмыш-жаза кодексинин 209-беренесине (Алдамчылык) ылайык кылмыш иши козголуп, шектүү катарында 1987-жылы туулган Э.Н. кармалган. Учурда тергөө иштери уланууда.