Израилдиктер Батыш жээктеги палестиналыктардын кампасы менен зайтун талааларын өрттөп жиберишти

11-ноябрда ондогон израилдик көчмөндөр Иордан дарыясынын Батыш жээгинде бир нече өрт коюшту. Алар палестиналык кампаны, бедуиндердин айылын жана оккупацияланган аймактын түндүгүндөгү айыл чарба жерлерин өрттөшкөн. Бир нече палестиналык жаракат алган.

Мындай кол салуулар, адатта, зайтун жыйноо мезгили башталганда көбөйөт, анткени палестиналыктар ошол убакта өздөрүнүн айыл чарба талааларына чыгышат.

БУУнун гуманитардык маселелерди координациялоо башкармалыгынын маалыматына караганда, октябрь айында израилдик көчмөндөр тарабынан зордук-зомбулук колдонуу менен жасалган чабуулдардын саны акыркы 20 жылдагы эң жогорку деңгээлге жеткен.

1967-жылдагы согуш маалында Батыш жээк жана Чыгыш Иерусалим оккупацияланган соң, Израил бул аймактарда болжол менен 160 конуш куруп, азыр анда 700 миңдей еврей жашайт. Бул аймактар Газа сектору менен бирге, палестиналыктар тарабынан келечектеги Палестин мамлекетинин аймагы катары каралат.

Болжолдуу маалыматтар боюнча, израилдик көчмөндөр 3,3 миллионго жакын палестиналыктардын жанында жашашат. Эл аралык укук боюнча бул конуштар мыйзамсыз деп эсептелет.

Шейшемби күнү тартылган видеолордо ондогон беткапчан адамдар Тулкарм шаарынын чыгыш тарабындагы дөңсөөгө чыгышканы көрүнөт. Жакын жайгашкан Бейт-Лид аймагында палестиналык кампаны өрттөп, жүк ташуучу унааларды да күйгүзүшкөн.

Ал эми Израил коргонуу армиясы аскерлери окуя болгон жерге “чырды токтотуу” үчүн келгенин, бир нече израилдик жаранды кармаганын билдирди. Израил полициясы төрт шектүүнүн камакка алынганын маалымдады.

Израил президенти Ицхак Герцог бул окуя боюнча X социалдык тармагында билдирүү жасап, болгон окуяларды “өтө олуттуу” деп мүнөздөдү. Ал “чакан, коркунучтуу жана ырайымсыз адамдардын тобун” айыптады.