Чүйдө таштанды челектен ымыркайдын сөөгү табылып, шектүү кармалды 

Чүй облусунун Сокулук районундагы таштандыдан жаңы төрөлгөн ымыркайдын сөөгү табылды. Бул тууралуу бүгүн, 14-ноябрда Чүй ОИИББинин басма сөз кызматы билдирди.

Маалыматка ылайык, 12-ноябрда болжол менен саат 12:30 чамасында Сокулук райондук милициясына Комсомольское айылынын тургуну таштандыда жаңы төрөлгөн ымыркайдын сөөгү жаткандыгы тууралуу маалымат берген.

Бул факт мыйзамга ылайык катталып, окуя болгон жерге дароо тергөө-ыкчам тобу жөнөтүлгөн.

"Ымыркайдын сөөгү ак баштыкка салынып, үстүнө кара түстөгү аял кишинин футболкасы оролгон. Ымыркайдын киндиги кесилбеген абалда болгон. Сөөк өлүмдүн так себебин аныктоо үчүн соттук-медициналык экспертизага жөнөтүлдү",- деп жазылган маалыматта.

Аталган факт боюнча Кылмыш-жаза кодексинин 125-беренеси (Эненин жаңы төрөлгөн баласын өлтүрүүсү) боюнча кылмыш иши козголгон. Ыкчам-издөө иш-чараларынын жүрүшүндө кылмышка шектүү катары, 23 жаштагы А.Ф. аттуу жаран кармалган.