Англия качкындар боюнча жаңы реформасын жарыялады

Улуу Британия өкмөтү качкын макамын алууну кыйындаткан жаңы реформалар пакетин жарыялады. Премьер-министр Кир Стармер документте дүйнөдөгү жаңжалдар жана күчөп жаткан миграция агымы өлкөнүн башпаанек системине басым көрсөтүп жатканын белгиледи.

Маалым болгондой, жаңы реформа качкын макамын убактылуу кылып, даттануу жол-жобосун кыскартат жана кайтып келүүдөн баш тарткан өлкөлөргө виза бербөө тартибин киргизет. Башпаанек сураган үй-бүлөлөргө ыктыярдуу кайтууга каржылык колдоо берилет, баш тарткандар мажбурлап кайтарылат. Качкындар ар 30 ай сайын кайра каралат жана туруктуу жашоо укугу 20 жылдан кийин берилет.

Ички иштер министри Шабана Махмуд парламентте азыркы башпаанек системи "көзөмөлдөн чыгып, адилетсиз" болуп калганын айтты. Акыркы төрт жылда 400 миңден ашык адам башпаанек сураган, алардын көпчүлүгү социалдык жардамга муктаж бойдон калууда.