Бишкектин Шүкүров көчөсүндө узундугу 17 метрлик көпүрө пайдаланууга берилди

Бүгүн, 18-ноябрда Бишкек шаарындагы Шүкүров жана Медеров көчөлөрүн бириктирген көпүрө ачылып, пайдаланууга берилди. Бул тууралуу борбор калаа мэриясы билдирди.

Маалыматка ылайык, көпүрөнүн жалпы узундугу 17 метр, туурасы 9 метр. Объектте курулуш иштеринин толук комплекси аткарылып, узундугу 14 метр болгон устундар орнотулуп, эки катмар асфальт төшөлгөн. Көпүрөнүн жүрүү бөлүгү эки тилкелүү, туурасы 10 метрди түзөт. Эки тарабына тең жөө кишилер үчүн туурасы 2,25 метр болгон тротуарлар жасалган.

"Ачылыш аземине Бишкек шаарынын мэри Айбек Жунушалиев, жакынкы үйлөрдүн тургундары жана башка коноктор катышты. Курулуш иштери ушул жылдын июль айында башталган",- деп билдирди мэрия.

Бишкек мэри учурда Ауэзов көчөсүндөгү көпүрө жасалып жатканын, жакынкы күндөрү пайдаланууга бериле турганын кошумчалаган.