Таласта төрөт үйүн модернизациялоодо эреже бузуулар аныкталды (фото)

Мамлекеттик архитектура-курулуш көзөмөлдөө департаментинин Талас аймактык башкармалыгы тарабынан курулуш объекттери көзөмөлдөнүүдө. Бул тууралуу Курулуш министрлигинен билдиришти.

Текшерүү иштеринин алкагында Талас шаарынын Бердике Баатыр көчөсү №1 дарегинде модернизациялоодон өтүп жаткан 2 кабаттуу облустук төрөт үйүндө курулуш талаптарынын аткарылбагандыгы аныкталды. Ошондой эле, курулуш иштерин этабы менен бөлүп кабыл алуу эрежелери одоно бузулган.

Натыйжада курулуш иштерин аткарып жаткан “Нак Строй” ЖЧКсына Укук бузуулар кодексине ылайык, 200 миң сом өлчөмүндө айып салынды.

Ошондой эле кемчиликтерди жоюу боюнча жазуу түрүндө эскертүү берилди.