АКШлык рэпер Мишель Обамага мыйзамсыз акча бергендиги үчүн 14 жылга эркинен ажыратылды

АКШда Fugees музыкалык тобунун мүчөсү, "Прас" деген ат менен белгилүү рэпер Праказрел Мишель, мурдагы президент Барак Обаманын 2012-жылдагы шайлоо кампаниясына чет өлкөлүк ишкерден келген миллиондогон долларлык кайрымдуулукту мыйзамсыз жолдор менен которгону үчүн 14 жылга эркинен ажыратылды. Бул тууралуу чет элдик басылмалар жазышты.

Маалым болгондой, Грэмми сыйлыгынын ээси Мишель, малайзиялык ишкер Лоу Таек Жходон алган 120 миллион доллардан ашык акчанын бир бөлүгүн 2012-жылы Обаманын президенттик кампаниясына мыйзамсыз жолдор менен которгону боюнча соттун чечими чыкты. Чечимге ылайык, акча которуу "чет өлкөлүк жарандан жасалган саясий кайрымдуулук" катары аныкталгандыктан, Мишель күнөөлүү деп табылып, 14 жылга эркинен ажыратылды.

Сотто прокурорлор федералдык жаза өтөө көрсөтмөлөрү Мишель үчүн өмүр бою эркинен ажыратууну сунуштаганын, Мишель "акча үчүн өз өлкөсүнө чыккынчылык кылганын" жана пландарын ишке ашыруу үчүн өкүнбөстөн жана талыкпастан калп айтканын билдиришти. Ата-энеси Гаитиден АКШга көчүп келген, Нью-Йоркто төрөлгөн Мишель, балалыктагы достору Лорин Хилл жана Вайклеф Жан менен Fugees музыкалык тобунун негиздөөчүсү катары белгилүү. Топ эки Грэмми сыйлыгын жеңип алган жана он миллиондогон альбом саткан.

АКШ мыйзамдарына ылайык, чет өлкөлүк жарандардын өлкөдө кандайдыр бир саясий кайрымдуулук же салым кошуусу кылмыш болуп саналат.