Казакстан, Кыргызстан жана Өзбекстан электр энергиясын жеткирүү боюнча макулдашышты 

Казакстан, Кыргызстан жана Өзбекстан гидроэнергетика тармагындагы кызматташуунун параметрлери жана өз ара колдоо чаралары боюнча макулдашышты. Бул тууралуу 22-ноябрда Алматыда Казакстандын энергетика министри Ерлан Аккенженовдун төрагалыгы астында өткөн тиешелүү кызматтардын жетекчилеринин жолугушуусунан кийин жарыяланды.

Сүйлөшүүлөргө Казакстандын суу ресурстары министри Нуржан Нуржигитов, Кыргызстандын энергетика министри Таалайбек Ибраев, Өзбекстандын энергетика министри Журабек Мирзамахмудов, Өзбекстандын суу ресурстары министри Шавкат Хамраев жана Кыргызстандын суу ресурстары, айыл чарбасы жана кайра иштетүү өнөр жайы министринин орун басары Алмаз Жээналиев катышты.

Тараптар Токтогул суу сактагычындагы кырдаалды талкуулап, электр энергиясын жеткирүүнү координациялоо жөнүндө макулдашышты. Казакстан менен Өзбекстан күз жана кыш мезгилдеринде электр энергиясын экспорттоо менен Кыргызстанга колдоо көрсөтүүгө даяр экенин тастыкташты. Бул ГЭСтерде кышкы өндүрүштү азайтып, кийинки мезгилине суу топтоого мүмкүндүк берет.

Топтолгон суунун көлөмүн 2026-жылдын жайында айыл чарба жерлерин туруктуу сугарууну камсыз кылуу үчүн Казакстан менен Өзбекстанга жөнөтүү пландаштырылууда.

Ошондой эле, өлкөлөр энергияны үнөмдөөнү күчөтүү боюнча биргелешкен чараларды көрүүгө макулдашышты. Өзбек тарап энергетикалык системаларды транзиттөө, жеткирүү жана баланстоо үчүн техникалык шарттарды берүүгө даярдыгын өзүнчө ырастады.

Жолугушуунун жыйынтыгында 2026-жылдагы вегетациялык мезгилге карата Токтогул суу сактагычындагы кышкы электр энергиясын жеткирүүнүн көлөмүн жана суу сактоо режимин юридикалык жактан белгилеген үч тараптуу протоколго кол коюлду.