"Ысык-Ата" санаторийинде коррупциялык схема уюштурулганы аныкталды

"Ысык-Ата" санаторийинен алынган каражаттарды мыйзамсыз пайдалануу боюнча туруктуу коррупциялык схема аныкталды. Бул тууралуу Улуттук коопсуздук мамлекеттик комитети билдирди.

Атайын кызмат санаторийдин айрым кызматкерлери өз кызмат абалынан кыянаттык менен пайдаланып, ден соолукту чыңдоо жайынын кызыкчылыктарына каршы иш-аракеттерди жасап, белгиленген финансылык жол-жоболорду айланып өтүү аркылуу материалдык пайда алуу максатында калкка көрсөтүлгөн кызматтардан алынган каражаттарды системдүү түрдө уурдоону уюштурушканы аныкталганын белгиледи.

Тактап айтканда, санаторийдин кызматкерлери кардарлардын акы төлөө тартиби жөнүндө билбегендигинен пайдаланып, акча каражаттарын накталай түрдө алышкан, ошол эле учурда төлөм терминалдары аркылуу регламенттелген төлөмдөр жүргүзүлгөн эмес жана эсепке алуу журналдарында бейтаптар жөнүндө белгилер көрсөтүлгөн эмес.

Бул факт боюнча кылмыш иши козголуп, анын алкагында "Ысык-Ата" санаторийинин кызматкерлери С.Э., Э.А., А.Г. жана А.у.О. күнөөсүн мойнуна алып, мамлекетке келтирилген зыяндын ордун толтурууга милдеттенишкен.