"Кекиртегиме тыгылып турду". Ташиев коррупционердин жанына отуруп калганын айтып берди 

УКМКнын төрагасы Камчыбек Ташиев коррупция кылгандар келтирилген чыгымды төлөп, боштондукка чыкканда кайрадан эле коррупцияга аралашып жаткандыктан мыйзамга өзгөртүүлөр киргизилгенин билдирди. Бул тууралуу Ташиев Регион телеканалына маек берип жатып айтты.

Анын айтымында, коррупцияга шектелип мурдагы премьер-министр кармалып, келтирилген чыгымды төлөгөн. Бирок ал куран окутуу иш-чарасында өзүнүн жанында отуруп калган.

"Эл бизге "кечээ эле муну камадыңар эле, бүгүн ал ойноп жүрөт. Мал-мүлкүн алып жатасыңар, бирок өздөрү жаза алган жок" деген пикирлерин айтып жатышты. Бул талап туура. Мен өзүм дагы ушундай учурга туш болдум. Мурда премьер-министр болуп иштеген чиновник коррупцияга шектелип кармалып, мүлкү конфискацияланган. Ал адам куран окутууда жаныма отуруп калыптыр. Ошондо өзүмдү аябай ыңгайсыз сездим. Жеген тамагым кекиртегиме тыгылып турду. Ооба, ал кишинин мал-мүлкүн мамлекетке өткөргөнбүз, бирок кечээги коррупционер менин жанымда отурат.

Анан биз орчундуу чараларды жасашыбыз керектигин ойлондук. Акча тараптан пайда берип жатканы менен, коррупцияны токтотуу тарабынан натыйжа бербей жатканын сездик",- деди Ташиев.

Ошондой эле бир топ мыйзамдарга өзгөртүүлөр киргизилгенин жанан азыр коррупция кылган адам келтирилген чыгымды төлөп берсе дагы камакка алынарын кошумчалады.