Конституциялык сот өлүм жазасы тууралуу сунушту карады

Конституциялык сот бүгүн, 10-декабрда “Кыргызстандын Конституциясына өзгөртүү киргизүү жөнүндө" мыйзам долбооруна корутунду берүү тууралуу сунушту карап чыкты.

Долбоордо балдарды зордуктоо, ошондой эле зордуктоо менен коштолгон адам өлтүрүү үчүн өлүм жазасын колдонуу мүмкүнчүлүгү каралган.

"Конституциялык сот өлүм жазасын конституциялык түзөтүү аркылуу калыбына келтирүү Конституцияга ылайык келбейт, жол берилгис жана укуктук мааниде мүмкүн эмес деген тыянакка келди.

Демек, “Кыргыз Республикасынын Конституциясына өзгөртүү киргизүү жөнүндө” мыйзам долбоору референдумга чыгарылышы мүмкүн эмес. Аны кабыл алуу демилгесин ишке ашыруу боюнча бардык жол-жоболор Конституциялык соттун корутундусу күчүнө кирген учурдан тартып токтотулууга тийиш", - деп жазылат маалыматта.

Буга чейин Конституциялык сот өлкө башчынын сунуштамасын кабыл алып, аны кароого киришкени кабарланган.

Белгилей кетсек, Баш мыйзамга өлүм жазасын киргизүүнү сунуштаган мыйзам долбоору октябрь айында коомдук талкууга коюлган. Учурда өлкөнүн Баш мыйзамы өлүм жазасына тыюу салат. Бул тыюу качан күчүнө кирген, өлкөдө акыркы өлүм жазасы качан ишке ашырылган? Бул суроолорго жооп алуу үчүн ушул шилтемеден окусаңыз болот.