Курулуш министрлигинин түзүмүнө жаңы департамент кошулду

Бүгүн, 11-декабрда курулуш министри Нурдан Орунтаев министрликтин түзүмүнө жаңыдан киргизилген Инженердик изилдөөлөр департаментинин капиталдык оңдоодон өткөн имаратынын ишмердүүлүгү менен таанышты. Бул тууралуу аталган министрликтин басма сөз кызматы билдирди.

Иш сапардын жүрүшүндө департаменттин директору Болот Чолпонбаев министрге капиталдык оңдоодон кийинки имаратты көрсөтүп, жүргүзүлгөн иштер боюнча маалымат берди.

Өз сөзүндө министр инженердик изилдөөлөрдүн курулуш тармагындагы маанилүү ордун белгилеп, департаменттин мындан аркы ийгиликтери, биринчи кезекте, кызматкерлердин кесипкөйлүгүнө жана жоопкерчиликтүүлүгүнө байланыштуу экенин баса белгиледи.

Белгилей кетсек, Кыргызстандын курулуш тармагындагы инженердик изилдөөлөрдүн тарыхы 1975-жылдан башталат. Ошол жылы, Кыргыз ССРинин Мамкурулушунун буйругуна ылайык, 1975-жылдын 26-декабрында Курулуштагы инженердик изилдөөлөр боюнча Кыргыз башкы институту (КыргызГИИЗ) түзүлгөн. 1993-жылы институт кайра түзүлүп, ачык акционердик коомдун статусун алган.

Андан соң Министрлер кабинетинин 2025-жылдын 15-июлундагы токтомуна ылайык, аталган институттун иш багытын улантуу максатында Курулуш министрлигине караштуу Инженердик изилдөөлөр департаменти түзүлгөн.

Департамент түзүлгөндөн тарта 50 жылдан бери эскирип калган имарат толук капиталдык оңдоодон өткөрүлүп, колдонууга берилди.

Инженердик изилдөөлөр департаментинин негизги миссиясы — өлкөдө жүргүзүлгөн инженердик изилдөөлөрдү:

• илимий-техникалык жактан негизделген;
• ишенимдүү жана комплекстүү;
• долбоорлоо, куруу жана эксплуатациялоо үчүн так жана коопсуз деңгээлде аткарылышын камсыз кылуу.

Департамент капиталдык курулуш объекттеринин сапатын жогорулатууну, инженердик коопсуздукту бекемдөөнү жана өлкөдөгү курулуш иштеринин технологиялык маданиятын өнүктүрүүнү максат кылат.