Швейцария 2026-жылга президентин шайлады

Швейцариянын экономика министри Гай Пармелин 2026-жылга өлкөнүн президенти болуп шайланды. Бул тууралуу чет элдик басылмалар жазышууда.

Швейцариянын Элдик партиясынын мүчөсү Пармелин 210 бюллетендин ичинен 203 добуш алып, өткөн кылымдан бери эң жогорку көрсөткүчкө жетти.

66 жаштагы Пармелин келерки жылы президенттик милдеттерин аткарат жана Сент-Галлен кантонунан чыккан Карин Келлер-Суттердин ордун алмаштырат.

Швейцарияда президент парламент тарабынан шайланат жана көпчүлүк өлкөлөрдөгүдөй күчтүү аткаруучулук ыйгарым укуктарына ээ эмес. Президент Федералдык кеңештин жети мүчөсүнүн бири гана болуп, кызмат жыл сайын ротациялык негизде өтөт.

Пармелин буга чейин АКШ менен товарлар боюнча тарифтерди төмөндөтүү маселесинде маанилүү сүйлөшүүлөрдү жүргүзүп, эл аралык аренада таанылган саясатчы катары белгилүү.