«Бизнесте жол ачып берем». Бишкекте алдамчылыкка шектүү кармалды

Бишкек шаарында алдамчылыкка шектелген 25 жаштагы жаран кармалып, убактылуу кармоочу жайга киргизилди. Бул тууралуу Биринчи май райондук милициясы 13-декабрда билдирди.

Маалыматка ылайык, О.Г. аттуу жаран арызы менен кайрылып, «А.» аттуу кызга карата чара көрүүнү суранган. Анда ушул жылдын май айынан октябрь айынын аягына чейин шектүү «бизнесте жол ачып берем» деген шылтоо менен жана ар кандай ырым-жырымдарды жүргүзүү аркылуу ишенимге кирип, 43 миң доллар өлчөмүндөгү акчасын алдап кеткени айтылган.

Бул факт боюнча Кылмыш-жаза кодексинин 209-беренеси (Алдамчылык) менен кылмыш иши козголгон. Шектүү катары 25 жаштагы М.К. аттуу жаран кармалып, убактылуу кармоочу жайына камакка алынган.

"Кармалган жаран өзүн «көзү ачык» катары тааныштырып, жарандарды алдамчылык жолу менен ишенимге кирип, жашоонун ар кандай тармактарында «жол ачып берем» деп акча каражатын талап кылган. Ошондой эле аталган «ырым-жырымдардын» жүрүшүндө акчаны көрүстөндөргө калтырууну суранган жана жип, ийне сыяктуу ар кандай буюмдарды колдонгон", - деп жазылат билдирүүдө.

Тергөө иштери улантылууда.

Эгерде сиз жабырлануучу же күбө болсоңуз, төмөнкү номурлар аркылуу кабар берсеңиз болот: +996 703 656 464 же 10