Мигранттын баласынын тагдыры тууралуу китеп жарык көрдү 

Бишкекте мигранттын баласынын тагдыры баяндаган "Батперек" китеби жарык көрдү. Бул тууралуу медиа-порталыбызга китептин автору Жолдубек Качкынбаев билдирди.

Айтымында, повестте миңдеген кыргыз үй-бүлөсүнүн тагдырына айланган миграциянын оор изи, эне-баланын ортосундагы сагыныч, түбү көрүнбөгөн кусалык баяндалат.

Китепте айылда ага-жеңесинин колунда калган Бектур аттуу алты жашар каармандын түрдүү зомбулукка кабылышы көркөм сүрөттөлөт. Бектурдун башына түшкөн кырсык бул үй-бүлөнүн жашоосун өзгөртөт. Чыгарма окурмандардын кеңири чөйрөсүнө арналат.

Жолдубек Качкынбаев 1997-жылы 4-январда Ысык-Көл облусунун Түп районуна караштуу Ой-Тал айылында төрөлгөн. 2016-жылы Кыргыз-Түрк «Манас» университетинин түркология бөлүмүнө тапшырып, 2021-жылы аяктаган. 2021-жылы ошол эле жогорку окуу жайдын түркология бөлүмүнө магистратурага тапшырып, 2023-жылы аяктайт.

Учурда Улуттук Илимдер академиясынын Чыңгыз Айтматов атындагы адабият институтунун аспиранты. Ал окурман журтуна орус, түрк, казак тилдеринен кыргызчага которулган көркөм чыгармалары жана адабий сын макалалары менен белгилүү.