Өкмөт башчы инвестициянын көлөмү өскөнүн айтты

Министрлер кабинетинин төрагасы Адылбек Касымалиев "Инвестициялык багыт: мамлекет жана бизнес" форумуна катышты. Бул тууралуу өкмөттүн маалымат кызматы билдирди.

Маалымдалгандай, өкмөт башчы анда өлкөдө жүргүзүлүп жаткан реформаларга кыскача токтолуп, акыркы беш жылда Кыргызстандын ички дүң продукциясы дээрлик үч эсеге көбөйгөнүн, быйылкы жылдын 11 айында ички дүң продукциянын өсүшү 10,2 пайызды түзгөнүн белгилеген.

"Кандай гана мамлекет болбосун инвестиция мамлекет үчүн экономикалык өсүштүн, туруктуулуктун жана өнүгүүнүн негизги булагы. Азыркы кырдаалда убакыт инвестордун негизги капиталы болсо, өлкө ичиндеги туруктуулук мамлекеттин жана бизнестин ийгиликтеринин ачкычы.

Ошол эле учурда стратегиялуу инвестиция бул келечектин перспективалуу ишенимдүү жолу. Биздин өлкөдө инвестициянын туруктуу өсүшү байкалууда. Бул Кыргызстан жагымдуу инвестициялык өлкөгө айланып баратканын тастыктайт. Белгилей кетсек, 2021-2024-жылдар аралыгында түз инвестициянын орточо жылдык көлөмү 1995-2020-жылдарга салыштырмалуу 140 пайыздан ашык өскөн", - деген ал.

Министрлер кабинетинин төрагасы ошондой эле жакында кол коюлган өлкө башчысынын "Кыргызстан президентине караштуу Инвестициялар боюнча улуттук агенттиктин статусун жогорулатуу жана ролун күчөтүү жөнүндө" жарлыгын эске салып, бул инвестициялык ишти стратегиялык багытта ыкчам жылдырууга жаңы дем берерин кошумчалаган.