Таиланд Камбоджа менен чек арада ок атышууну токтотуунун шарттарын атады

Эгерде Пномпень Бангкоктун үч талабын аткарса, Таиланд Камбоджа менен ок атышууну токтотуу боюнча сүйлөшүүлөрдү жүргүзөт. Бул тууралуу брифингде Таиланддын Тышкы иштер министрлигинин басма сөз катчысы Никондет Пхалангкун билдирди.

"Биринчиден, Камбоджа ок атышууну токтотууну эл алдында жарыялоосу керек. Экинчиден, ок атышпоо келишими аткарылып, сакталышы керек. Үчүнчүдөн, Камбоджа миналардан тазалоо иштерине олуттуу түрдө катышуусу керек", - деп келтиришет анын сөздөрүн чет элдик басылмалар.

8-декабрда Khaosod гезити Камбоджанын аскерлери Таиланд аймагындагы Анупонг базасына ок атканын жазды. Натыйжада бир тай аскери каза болуп, экөө жаракат алган. Таиланд армиясы чек арага жакын төрт провинциянын тургундарын коопсуз жайларга көчүүгө чакырды.

Reuters 9-декабрда чек ара боюнча бир нече аймакка жайылган куралдуу кагылышуулар жүздөгөн адамдарды жабыркатканын кабарлады. Акыркы маалыматтарга караганда, Таиланд тараптан жаракат алгандардын саны 29 адамга жетти.

10-декабрда АКШ президенти Дональд Трамп Камбоджа менен Таиланддын ортосундагы кырдаалды жөнгө салууга кайрадан кийлигишүүгө даяр экенин билдирди. Ал буга чейин да эки мамлекеттин ортосундагы чыңалууну токтотууда роль ойногон.

Источник: super.kg маалымат-маанайшат порталы