Кызматынан кол жууган министр мас абалында унаа башкарган

Жол кыймылынын коопсуздугун камсыздоо башкы башкармалыгы бүгүн эле кызматынан алынган илим, жогорку билим берүү жана инновациялар министри Бактияр Орозов мас абалында унаа башкарып бара жатканда кармалганын тастыктады.

Башкармалык бүгүн, 15-декабрда болжол менен саат 01:40 чамаларында жол тескөөчүлөр тарабынан ал Кой-Таш айылында Toyota Camry үлгүсүндөгү унаасы менен бара жатканда токтотулганын белгиледи. Ал Бишкек шаарынын борбордук наркология бөлүмүнөн текшерүүдөн өтүп, спирттик ичимдигин ичип алганы аныкталган.

Ага карата Укук бузуулар жөнүндө кодексин 193-беренесинин негизинде протокол түзүлүп, унаасы айып короого киргизилген.

Буга чейин Социалдык тармактарда Бактияр Орозовго окшогон адам тартылган видео тараган. Анда анын наркология бөлүмүндө текшерүүдөн өтүп жатканын көрүүгө болот.

Айта кетсек, министр бүгүн эле кызматтан алынды. Президенттин администрациясы тараткан маалыматта Орозов мамлекеттик жана муниципалдык кызматкерлердин этикасынын талаптарын сактабагандыгына байланыштуу кызматынан бошотулганы айтылат.