Жетекчилердин кызматкерлерден белек алуусуна тыюу салынды

Өкмөт башчы Адылбек Касымалиев мамлекеттик органдардын жетекчилеринин кызматкерлеринен белек алуусуна чектөө киргизилгенин билдирген. Анын билдирүүсүн президенттин маалыматтык саясат бөлүмүнүн башчысы Дайырбек Орунбеков Фейсбуктагы баракчасында бөлүштү.

Анда Адылбек Касымалиев жыл сайын мамлекеттик органдар менен министрликтерде жаңы жылдык корпоративдик иш-чаралар өткөрүлүп келгенин жана алар ашыкча чыгымдар менен коштолгонун белгилеген.

"Кызматкерлер жетекчилерине белек берип, корзина ташып убара болушчу. Ушул көрүнүштөрдү эске алып, быйыл жаңы жылдык корпоративдерге жана мамлекеттик кызмат жетекчилеринин өзүнүн кызматкерлеринен, кол алдындагыларынан баалуу белектерди алуусуна чектөө киргиздик.

Бирок айрым жетекчилер бул чектөөнү туура эмес түшүнүп, балдарга арналган жаңы жылдык иш-чараларды да өткөрбөгүлө деп жатышыптыр. Балдардын жаңы жылдык майрамдарын чектөөгө болбойт",- деген өкмөт башчы.

Ошондой эле коюлган чектөө мамлекеттик органдарга гана тиешелүү экени кошумчаланган.