Түркия Кара деңиздин үстүнөн белгисиз учкучсуз аппаратты атып түшүрдү

Түркиянын аскерлери Кара деңиздин үстүнөн өлкөнүн аба мейкиндигине багыт алып учуп келе жаткан белгисиз учкучсуз аппаратты атып түшүрүштү. Бул тууралуу өлкөнүн Коргоо министрлиги маалымдаганын чет элдик басылмалар жазышууда.

Маалыматта айтылгандай, аскерлер Түркиянын аба мейкиндигине жакындап келе жаткан объектти аныкташкан. Алгач учкучсуз аппарат көзөмөлгө алынган, бирок кийин аны жок кылуу чечими кабыл алынды.

"Аба мейкиндигинин коопсуздугун камсыз кылуу максатында НАТО жана улуттук командачылыктын көзөмөлүндө турган F-16 истребителдерине ыкчам согуштук аракет көрүү тапшырмасы берилди. Текшерүүнүн жыйынтыгында аба объекти башкаруудан чыккан учкучсуз учуучу аппарат экени аныкталды. Мүмкүн болгон терс кесепеттердин алдын алуу үчүн ал калктуу конуштардан алыс, коопсуз аймакта жок кылынды",- деп билдирди Түркиянын Коргоо министрлиги.

Учкучсуз аппарат кимге таандык экени азырынча белгисиз. Ошондой эле анын жарандык же аскердик максатта колдонулгандыгы тууралуу так маалымат жок.